Opið bréf frá Magga yfirþjálfara
Kæru foreldrar og klifrarar
Við vonum að þið hafið átt frábært sumar! Við hjá 600Klifur erum afar spennt að tilkynna að skráning er nú opin fyrir komandi haustönn.
Athugið: Iðkendur sem æfðu hjá okkur á síðustu önn fá forgang í sína hópa
áður en opnað verður fyrir nýja iðkendur.
Iðkendafjöldi okkar á seinustu önn fór fram úr okkar vonum og ekki allir komust að. Nú getum við tekið á móti fleirum með því að bæta við hópum og þjálfurum. Með færri börnum á hvern þjálfara, auknu plássi á veggnum og skýrari framförum—kynnum við nýja stundaskrá, fleiri hópa, og strangari hópastærðarmörk fyrir veturinn. Helstu breytingar verða á Krílahóp, Litlahóp og Framtíðarhóp.
Frábær fríðindi: Öll námskeiðsgjöld innihalda frían aðgang/kort í klifursalinn utan æfingatíma alla önnina á meðan námskeiðið stendur yfir!
Hér fyrir neðan er heildaryfirlit yfir alla hópa, æfingatíma, tímabil, hámarksfjölda og námskeiðsgjöld fyrir komandi önn. Æfingar falla niður á almennum frídögum og í vetrarfríum nema annað sé tekið fram.
Helstu kostir nýs skipulags
-
Aukinn frjáls aðgangur: Öll börn sem eru skráð á námskeið fá frían aðgang í salinn á opnunartíma utan æfinga til að æfa sig meira eða klifra með fjölskyldunni!
-
Aukin gæði & Færri börn á þjálfara: Við höfum takmarkað Litlahóp og Framtíðarhóp við aðeins 8 börn á hvern þjálfara til að tryggja meira klifur og betri athygli.
-
Sérstakur tími í lokuðum sal: Krílahópurinn fær allan salinn út af fyrir sig á laugardagsmorgnum og Afrekshópurinn fær sérstakan tíma í lokuðum sal á sunnudagskvöldum.
-
Frístundastyrkur: Öll námskeiðin okkar eru skráð hjá Abler og hægt er að nýta Frístundastyrk sveitarfélaganna við skráningu.
Forgangsskráning gildir til og með þiðjudagskvöldinu 11.ágúst
Opnað verður fyrir almenna skráningu á miðnætti á þriðjudag
Æfingahóparnir
Skráning fer fram í gegnum Abler
🎂 Mikilvæg dagsetning: 1 árs afmæli 600Klifur & Afmælishátíð!🎂
Frá 20. október til 4. nóvember verður salurinn okkar að hluta til lokaður vegna 1 árs afmælis 600Klifur og viðbóta á barnasvæðinu okkar:
Nýjar þrautir & Afmælismót: Salurinn verður allur endursettur frá grunni með glænýjum, spennandi leiðum og haldið verður upp á afmælið með stóru klifurmóti og hátíðardagskrá!
Betra barnasvæði: Við nýtum tækifærið og gerum skemmtilegar uppfærslur á barnasvæðinu okkar.
Breytingar á æfingum: Einungis fáeinar æfingar falla niður eða breytast á þessu 2 vikna tímabili. Yfir þetta tímabil fá iðkendur gríðarlegt virði í glænýjum leiðum og eru allir krakkar og fjölskyldur hvattar til að taka þátt í þeim skemmtilegu viðburðum sem verða í boði! Afrekshópur mun taka þátt í mótinu og Úrvalshópur og Framtíðarhópur fá einnig móts-æfingu á tímabilinu.